最近我好鍾意聽陳老C嘅podcast，或者睇佢嘅YouTube頻道。佢介紹嘅書其實都幾啱我睇。啱啱見到佢有條片講「漢隆剃刀定律」，覺得幾有趣。「漢隆剃刀定律」最早出現喺1990年嘅《黑客字典》。呢個原則嘅提出者係羅伯特·J·漢隆（Robert J. Hanlon），意思係：能解釋為愚蠢嘅，就唔好解釋為惡意。
減少情緒偏見：在法律糾紛中應用「漢隆剃刀定律」
喺法律糾紛中，當事人往往會將對方嘅行為解釋為惡意，呢可能會導致情緒激化同誤判。漢隆剃刀定律可以幫助我哋更冷靜咁睇待問題，從而做出更公正嘅判斷。
例如，一方可能會認為對方故意拖延交付文件，但實際上可能只係因為對方工作效率低或者溝通唔暢。漢隆剃刀定律提醒我哋，應該首先考慮呢啲無意嘅因素，而唔係立即假設對方有惡意。
我成日處理官司或者糾紛時，發現好多大嘅衝突其實都係由小誤會引起嘅。當雙方認定對方有惡意時，佢哋會過份演繹對方嘅每一句說話或者每一封信，覺得背後一定有計算、企圖或者陷阱。所以好多時候，我會提醒客人諗下其實呢句說話會唔會有其他可能性，背後可能冇特定動機。例如，某啲信件會唔會只係律師趕住收工所以咁寫，或者對方冇畀錢律師所以先唔覆？
換位思考：避免誤會同糾紛
根據我嘅經驗，好多人講某啲說話或者做某啲嘢，只係純粹愚蠢，或者喺壓力下嘅直覺反應。真係唔係咁多人有能力有咁多機心同盤算。好多時候嗰啲宮心計嘅劇情真係只會喺電視出現。就算我哋作為律師，成日諗策略同計謀，講嘢都唔會每句都諗過度過，好多時候真係純粹直覺。
我哋成日話要換位思考同博弈，但正正就係因為誤會咗對方嘅意思或者意圖，所以錯誤地回應，令誤會同糾紛越嚟越大，最後甚至變成官司。
打官司時，考慮多啲對方嘅諗法無可厚非。不過，如果大家傾緊和解，希望大家將課題擺返喺自己身上，即係對方點諗係對方嘅課題，我哋只需關注自己想要乜嘢。唔好諗太多，例如喺離婚和解中，唔好考慮對方唔肯買層樓係咪因為想同另一個女人住，係咪特登激死你。你只要考慮自己想攞走乜嘢，點樣先可以令自己更好move on，繼續過你嘅美好人生。否則下下諗對方有幾衰，只會陷入漩渦，永遠走唔返出嚟。
