長話短說
離婚唔一定要對方同意或者簽字，你係可以單方面申請離婚的，除非你係用一年分居離婚。而如果唔用「一年分居」，其實可以用「不合理行為」。
離婚可以用咩理由?
實在有大多人問過我，係未一定要對方同意先可以離婚，答案係：NO！首先喺法律上，離婚只有一個理由，就係「婚姻已破裂到無可挽救」喇！要搞離婚，先決條件係雙方結婚超過一年，而唔計雙方共同申請離婚嘅情況，無論對方同唔同意都好，只要你show到「婚姻已破裂到無可挽救」，就可以單方面提出離婚呈請。至於點樣先show到「婚姻已破裂到無可挽救」呢？法庭係接受以下5大情況作為「婚姻已破裂到無可挽救」而離婚嘅理由：
- 一年分居，而對方同意；
- 兩年分居；
- 不合理行為；
- 通姦；
- 遺棄。
分居一年，對方同意
顧名思義，雙方分居或分房連續超過一年，而對方又肯簽名確認，就可以成立。調反轉講，如果對方唔肯簽，又或者你唔知對方肯唔肯簽，就最好唔好用呢個理由，免得搞到一半又要改理由重新申請過。咁嘅情況，你可以考慮改用下面所講嘅「不合理行為」提出離婚。
分居兩年
呢個理由就無需要對方同意，你單方面提出就可以，呢個應該係最常見嘅離婚理由。
關於分居: 同屋共住都依然可以算係分居！
第二樣嘢，又係好多人問，就係如果對方唔肯簽字咁點算? 如果你用一年分居，對方同意為理由，又或者係兩位共同向法庭申請離婚，咁當然一定要對方簽字先離到婚。但如果你用其他離婚理由，咁只要你向法庭證明到，你已經合法地將離婚文件咁即咗對方就可以，對方唔簽名唔入文件，就只係佢放棄佢嘅權利啫。
不合理行為
即所謂 “UB” (unreasonable behaviour)。法律上係「因答辯人的行為而無法合理期望呈請人與其共同生活」，操作上「不合理行為」可以包括好多情況，譬如嚴重啲嘅可以係對方有嫖、賭、飲、毒、家暴等行為，無咁嚴重嘅可以係無俾家用、經常唔顧家、有外遇、唔幫手照顧仔女等等都可以係，唔一定要係犯罪行為，總之係你容忍唔到嘅行為。留意返，法庭唔會有一個清單話點樣先係不合理行為，永遠都係case by case視乎每個個案嘅實際情況。另外，對非對方爭辯，否則係唔需要呈交呢啲不合理行為嘅證據俾法庭嘅。
值得留意嘅係，一般而言，對方嘅行為並唔會影響婚姻資產嘅分配，而婚姻呈請書呢啲法庭文件亦唔係公眾可以查閲嘅公開文件，因此如果雙方已經分居兩年的話，就唔建議刻意用不合理行為數臭或寫衰對方。
通姦
有外遇，應該唔駛解釋係咩啦。「通姦」係導致離婚嘅常見原因，但就好少人會用嚟申請離婚。無他，正如上段解釋「不合理行為」一樣，一般而言，對方有婚外性行為並唔會影響婚姻資產嘅分配。而婚姻呈請書雖然唔係公眾可以查閲嘅公開文件，但唔少人都唔唔想喺法庭留個「通姦」紀錄，所以有較大機會抗辯，姑勿論夠唔夠證據證明對方通姦，剩係因為雙方就有排拗而拖慢咗成單離婚case嘅進度，就已經好唔理想。所以好多人都會用返「不合理行為」嚟提出離婚。而唔用「通姦」，其實就可以用返「不合理行理」呢個相對 「溫和」嘅理由。
遺棄
對方遺棄你最少連續1年，呢個亦係好少用嘅離婚理據，因為一般嚟講，如果對方走咗去唔見影，其實已經可以用「不合理行為」嚟提出離婚。
應用甚麼理據支持理婚?
留意返，無論你用咩理由提出，對方都係有權反對離婚嘅！所以唔好再問，如果對方唔同意，對方唔肯簽等等咁點算。事實上，就離婚提出抗辯係可能但並唔常見，事關拍手要兩隻手掌先拍得響，如果其中一方堅決想離婚，其實無論另一方點反對，個婚姻都係救唔返，最終都係會離到。譬如話，我就當對方真係證明到佢無不合理行為，咁提出離婚一方只要灘夠兩年，就可以改用「分居兩年」去離婚，就已經唔駛理對方同唔同意。所以實際啲咁諗，除非有特別原因，否則大部份人都唔會嘥錢嘥時間去抗辯嘅。而離婚官司，大部份都係處理撫養權同埋分身家嘅問題嘅啫。當然，現實人亦有人會因為唔同嘅原因而會反對離婚，例如宗教信仰考慮等，呢度就唔詳細講。
綜合而言，我會建議以下做法：-
- 如果已經分居兩年，就用「兩年分居」;
- 如果分居唔夠一年但唔夠兩年，對方合作就用「一年分居」；
- 如果分居唔夠一年但唔夠兩年，對方唔合作就用「不合理行為」;
- 如果分居唔夠一年，就用「不合理行為」
如何證明分居?
又好多人問，點樣證明分咗居，點樣證明有不合理行為，呢個就係證據上嘅問題。首先，你嘅證供本身就已經係證據，唔一定要搵相呀影片呀文件呀咁證明。第二，你都可以考慮返，對方會唔會抗辯，因為如果對方唔抗辯，咁法庭根本就無須處理同離婚理據相關的證據，而係會按程序頒布離婚命令。第三，如果你預期對方咩都會同你拗，咁你當然最好預備定一啲證據，你亦可以做定啲文件，例如「分居協議/通知書」等去支持你嘅離婚申請。
假如對方唔肯簽文件?
只要你已經合法地送達咗離婚文件俾對方，即使對方唔簽唔理，甚至乎已經失蹤，你都可以單方面繼續離婚程序。詳情可以睇呢篇文章：離婚迷思│對方唔同意，就離唔到婚?
律師可以點樣幫你?
律師可以按你嘅情況，幫你分析返應該用邊個理據嚟離婚，並且評估一下證據又係唔係足夠。又，如果係答辯一方，亦可以幫你分析應否反呈請(cross-petition)，是否要抗辯等。
免責聲明：
本網提供的資料只供初步參考及教育用途，不能取代正式法律意見，或被引用作為任何法律理據。本網站或鄧王周廖成利律師行或資料提供者對本網站所提供的資料概不負責，亦不保證本網站之資料是準確無誤或完整或最新的。本網站所提供的所有資料均非正式法律意見。閣下在作出任何法律行動或決定前，應向閣下的律師咨詢並取得全面的法律意見。任何使用本網站的資料而引起的法律訴訟或其他行為須由閣下自行負責。
