長話短說
離婚唔一定要對方簽字，你係可以單方面申請離婚的，除非你係用「一年分居」或者「共同申請」嚟提出申請。
對方唔簽可以點?
好多好多人都會問，如果對方唔肯簽字離婚，咁點算? 簡單答案，就係離婚根本唔需要對方簽字嘅！除非你係用「共同申請」(joint application)或者「一年分居」呢兩個情況，咁先必需要對方簽字嘅。
其實對方簽唔簽名其實係屬於另一個議題，即你有否將離婚文件「送達」，即係俾到對方。所以就算對方唔肯簽，但只要你證明到，你已經合法地將離婚文件俾咗對方就OK架喇，佢唔簽、唔理，係佢放棄自己嘅法律權利啫。
送達離婚文件嘅方法
. 郵寄
咁點先可以合法地送達離婚文件俾對方呢？首先，重要事件要講３次，你係唔可以親自將離婚呈請書交俾對方（答辯人）嘅。咁唔可以親手俾，但你係可以郵寄俾對方，又或者由律師行職員或親友交俾對方嘅。對方收到離婚文件之後，要喺８日內簽返表格４同交返俾法庭。咁呢份簽回嘅表格４就係證明已經將離婚文件「送達」嘅證據喇。
. 經律師行或親友親身送達
咁又有幾個經常會遇到嘅情況，第一，如果對方唔肯簽返表格四又可以點樣呢？如果你知道對方嘅去向，係可以考慮經律師行職員或者親友親身派俾，咁做返個簡單誓章就可以證明成功派送喇。
. 替代送達 (substituted service)
登報紙
第二，如果你唔知對方住址或者返工嘅地方，又或者對方已經失蹤，但仲喺香港，咁你可以考慮申請「替代送達」，即係用其他嘅方法將離婚文件交到對方手中，例如喺香港流通嘅報紙嗰度登廣告。
經社交媒體或電子方式
又或者，如果你知道對方有用WhatsApp、Email等，亦可以申請用呢啲替代方法交俾對方。
經內地法院送達
如果對方喺國內居住，而你又有佢嘅地址同電話，咁你就可以經法庭委托內地法院將離婚呈請書送達俾對方嘅。
. 當成已經交達 (deemed service)
如果有證據證明對方已經收到，例如佢曾經打電話或者WhatsApp話你知佢收到，又或者對方無簽文件但又有出席法庭聆訊，咁就可以申請「當成已經送達」的命令。
. 免除送達 (dispense with service)
如果對方已經唔喺香港，而你無辦法聯絡到佢，你係可以向法庭申請「當成已經送達」。例如，雙方鬧返咗之後，已經好多年無聯絡，已經同對方完全失去聯絡。有可能對方去咗外國生活唔再返香港，香港電話都已經無咗。咁成個世界咁大又咁多人，要搵佢出嚟就真係大海撈針。呢啲情況就可以考慮申請「當成已經送達」。
不過「替代送達」同埋「當成完成送達」並唔係你隨便申請法庭就會批嘅，你必須向法庭證明到你已經盡晒能力去將離婚文件交俾對方，例如你已經打佢電話、上門過搵佢，又用過唔同嘅渠道，例如通過佢嘅家人、朋友、同事，甚至WhatsApp Facebook Email都搵唔到佢，咁法庭先會考慮批准嘅。
總結
一年有成兩萬單離婚，真係咩情況都會發生，不過so far我都未見過有離婚case係卡住喺「送達」呢part嘅，所以大家都無需過份擔心因為對方唔簽名而離唔到婚。但當然，如果出現替代送達或是免除送達嘅情況，你係需要花費更多錢同時間去處理呢個案件。
