非常值得睇嘅《凝視三星堆──四川考古新發現》展覽
日前放假，我約朋友同佢女兒一齊去香港文化故宮博物館睇 凝視三星堆──四川考古新發現 嘅三星埋文物展。故宮博物館自從開館以嚟，每日都好多人去參觀，我怕人多，所以一直未去參觀過。但今次呢個三星堆展覽，就真係不得不去，因為有120件精彩展品，由四川帶到嚟香港。如果你同我一樣，曾經讀過李白嘅「蜀道難」，你可能都會想嚟睇睇，究竟蜀嘅文化遺跡係點樣嘅呢? 而且呢啲三星堆嘅文物超過3千年歷史，但卻顯示出高超嘅工藝。而最iconic嘅面具，仲令人聯想起外星人添！
小插曲與朋友嘅法律智慧
不過，當日有件小插曲發生咗。話說當日我哋坐小巴前往故宮博物館。中途有一群人上車，但咁啱得一個位，於是有位落單嘅女士企咗喺度，唔知點算好。
呢個時間，司機大佬叫我同朋同佢七歲女兒「拍爛檔，坐埋啲，俾個位人」。我朋友即刻澄清，小女孩係有俾車費的，而咁大個亦都應該要佔一個住位嘅。但司機大佬繼續堅持，仲叫落單女士俾返5蚊車費我朋友。
我朋友繼續拒絕，更指出超載係犯法嘅，而且有事起嚟，保險唔賠架喎！我無諗過我朋友咁有法律智慧，做媽媽有保護女兒嘅自覺，果然係會精明啲！我亦即刻幫口，表明我哋唔會做任何違法嘢，絕對唔會「讓座 」。
喺咁嘅情況下，嗰位落單女士就落返車，司機大佬就繼續開車。呢度澄清返，雙方雖然大聲，但都係有禮貌嘅。司機大佬都係想幫人，唔想嗰位女士落單咁尷尬啫。香港人最叻「轉彎」、「執生」，都係想解決問題啫。不過為咗一時方便而違法，後果確實可以好嚴重。
超載紛爭：香港道路交通規例解析
就超載而言，根據《道路交通(交通管制)規例》第53(3)條，超額載客屬違法行為，可被判罰款$450。就後果而然，超載唔係嚴重嘅罪行，而我哋行內叫呢啲超速超載簡單違反交通規例嘅嘢做「交通底」或者「藍紙」。同一般嘅刑事紀錄嚟比較，唔會影響你移民搵工，但若果日後唔好彩犯咗啲較嚴重嘅交通罪行，如醉駕或者危駕駛，而你張「藍紙」又花晒，法官自然會覺得呢位被告人係不嬲都亂咁揸車，唔係好守交通規則嘅人，當然係會蝕章。
但更大鑊嘅係，萬一發生交通意外，小巴嘅保險好可能會踢保，令到一眾乘客得唔到應有嘅保障。 (呢度補充返，香港係有「香港汽車保險局」，即MIB去cover返無第三方保險嘅情況，但索償會複雜咗好多，保障亦都少咗嘅，另文再詳述。)
到站之後，有位白髮老先生俾個good我哋，話我哋做得啱。起初仲以為佢串緊我哋墨守成規，原來佢係真心讚我哋喎!
守法精神：小巴超載事件反思
筆者並唔係鐘意嘈交嘅人，生活上遇到衝突，喺大部份嘅時間都會盡量忍讓，以「結緣不結緣」嘅心態去處理。但作為律師，工作上亦都係要據理力爭。我見到友人女兒不明所以，好似無辜成為眾矢之的咁，於是我同小女孩解釋返：「人哋提出要求，我哋要諗下，係未合理，係未合法嘅。如果係唔啱，就算情況好尷尬，都要學媽咪咁，大聲拒絕，唔好人哋講咩都照做。」
守法精神同維護自己立場嘅勇氣，呢啲係好重要嘅價值，要由細培養。我朋友作為母親，能夠身教，就更加令佢嘅女兒更加容易明白。
為什麼你應該始終守法？
借題發揮一下，我亦實在見過太多人，特別係年輕人，因為朋友或上司叫到，唔好意思推，就明知可能有問題都照做，結果就被警察拉咗，成為代罪羔羊。我遇過嘅案例有：
- 19歲仔做搬運工人，因為上司叫到，所以將一箱私煙送去某工廠大廈，遇著海關人員截查，管有未完稅私煙，違反《應課稅品條例》罪成，判監18個月。
- 23歲女，朋友借戶口收錢，後與朋友因詐騙被捕 (佢朋友網上賣嘢，收咗錢後唔發貨)。
- 32歲遊客，在香港遇到同鄉，於是一齊喺香港玩。朋友聲稱遺失證件同財物，請遊客幫手去當鋪將手錶當咗佢。呢隻手錶實為賊贓，朋友其後被控爆格，遊客則承認處理贓物罪罪成，判處監禁12個月。
- 17歲女，當時懷孕，男友話海關唔會搜大肚婆，於是女士將毒品收埋喺裙底，過關時斷正被捕。
再長氣啲，千祈唔好以為你只係借下戶口或者幫下手就無事，根據第221章 《刑事訴訟程序條例》第89條，協助、教唆或慫恿 (aiding and abetting)係同罪，唔係單單因為你唔係落手搶或從中無得到利益就會無事。再嚴重啲，根據第220章《刑事罪行條例》串謀罪就更加嚴重。簡單啲去理解，你朋友打劫，你幫手睇水，咁你都有罪，就係咁簡單。如果你明知你朋友借你戶口用嚟做非法用途，亦已經構成洗黑錢罪！
別誤信因為未成年就唔會有事，最多都係感化，法律上14歲以上已經可以判監架喇！
亦都唔好信，好小事無人知，我見過好多單，都係執法人員明顯係收到線報而嚟截查，然後當事人斷正。咁，執法人員點解會收到線報，就你自己諗下喇！
免責聲明：
本網提供的資料只供初步參考及教育用途，不能取代正式法律意見，或被引用作為任何法律理據。本網站或鄧王周廖成利律師行或資料提供者對本網站所提供的資料概不負責，亦不保證本網站之資料是準確無誤或完整或最新的。本網站所提供的所有資料均非正式法律意見。閣下在作出任何法律行動或決定前，應向閣下的律師咨詢並取得全面的法律意見。任何使用本網站的資料而引起的法律訴訟或其他行為須由閣下自行負責。
