搬遷大吉
舊年喺Squarespace開咗個同名嘅blog，setup算係容易，但發現Squarespace對中文內容嘅support不太好，行距字型調較咗好耐都唔好睇，文章排版總係怪怪的，做唔到心目中想要嘅效果。
兼且我想轉去用 .com.hk嘅網域，等其他地區嘅網友，一睇就知道呢個網只針對香港法律事宜。於是今年膽粗粗，決定自己做個Wordpress網站。
起初睇youtube片以為真係好簡單，但落手落腳做起嚟先發現九唔少技術性嘅嘢要解決。幸好呢個世界有google大神，基本上只要肯花啲時間研究，都係解決到嘅。而且，用遊樂心態，左砌砌又砌砌，其實又幾有趣！而花咗一啲時間，最後個站終於面世，成功感真係好大！
喺舊站成年只係寫咗6篇文章，搬到新站，我將會每星期最少出一編文章。希望呢啲文章，會幫到大家！
開Blog大吉
好，講返開Blog嘅緣由。
有無試過睇法例，隻隻字都明，但砌埋一齊就唔明？實不相瞞，作為律師嘅我，好多時都一樣睇唔明啲條例講咩。例如過去幾年因為Covid-19而經常用到嘅Cap 599防疫條例系列，真係睇到嘔晒白泡。
不過呢個唔係草擬條例嘅人嘅錯，因為要純用文字去描述一啲極之複雜嘅概念以規範人類嘅行為，無論寫嗰位定係睇嗰位，都要好高功力先做到，一般市民無受過法律教育，當然唔會咁易就理解到。
再加上，我哋嘅法律大部份由英國而嚟，而英國嘅法律又摻入好多拉丁文，而我哋用嘅口語同書面語又唔同，喺多重演譯後就變咗好似火星文咁。
所以，我希望可以整個用廣東話寫嘅blog，令到法律容易啲入口。而家亦都多咗好多工具，呢如Infographics (資訊圖)，可以較為清楚咁表達啲法律概念。我希望可以化繁為簡，用口語、point form、Infographics，甚至短片去解釋一啲一般市民會用到嘅法律。
不過我都要戴返個頭盔，雖然我嘗試將法律簡單化咁表達出嚟，但法律本身真係好複雜嘅嘢。每個案都唔同，要睇法律條文又要睇案例，無嘢係可以一刀切咁應用。因此，呢個blog嘅資訊只係旨在俾個概念大家，等大家處理問題有個起步點。最終，你都係要問返你嘅律師，先至好作出任何法律決定。
